17 ноябри соли 2023 дар доираи сафари корӣ ба вилояти Суғд вохӯрии раиси Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон генерал-полковники милитсия Рустам Назарзода бо ҳайати шахсии Раёсати КҲФ дар вилояти Суғд, роҳбарони раёсат ва бахшҳои Раёсат воқеъ дар шаҳру навоҳии вилоят баргузор шуд. Сарвари Кумита ҳамчунин дар маросими бошукӯҳи савгандёдкунии наваскарони даъвати тирамоҳӣ иштирок намуд.
Зимни вохӯрӣ дар Раёсат роҳбари Кумита ҳисоботи роҳбарони раёсат ва шӯъбаҳои Раёсати КҲФ дар вилояти Суғдро оид ба чорабиниҳо дар соли 2023, рафти иҷрои «Стратегияи миллии Ҷумҳурии Тоҷикистон оид ба коҳиши хатари офатҳои табиӣ барои солҳои 2019-2030” ва «Барномаҳои миёнамўҳлати давлатии ҳифзи аҳолӣ ва ҳудуд барои солҳои 2023-2028» оид ба ҳамкорӣ бо мақомоти иҷроияи маҳаллии ҳокимияти давлатиро шунид. Ҳамчун дар вохӯрӣ масъалаҳои омодагӣ ба давраи зимистон мавриди баррасӣ қарор гирифт.
Дар идомаи сафари корӣ Раиси КҲФ аз қисми низомии Кумита воқеъ дар ҳудуди ноҳияи Б.Ғафурови вилояти Суғд боздид намуда, дар маросими тантанавии савганди наваскарони даъвати тирамоҳӣ ба Ватан ширкат кард.
Қабл аз маросими тантанавӣ раиси Кумита бо шароити зисту зиндагонии хидматчиёни ҳарбӣ, мавҷудияти захираҳои ғизоӣ барои давраи зимистон дар анборҳои қисми ҳарбӣ ва омодагӣ ба давраи зимистон шинос шуд.
Сипас, раиси КҲФ дар маросими савгандёдкунии 54 сарбози даъвати тирамоҳӣ ширкат варзид. Дар маросими тантанавӣ ҳамчунин раиси шаҳри Гулистони вилояти Суғд Раъно Ҳошимзода, муовини раиси ноҳияи Б.Ғафуров Фаридун Ҳамидзода, сардори Раёсати Кумитаи иҷроияи ҲХДТ дар вилояти Суғд, мудирони шӯъбаҳо иштирок доштанд, бахшҳои Раёсати КҲФ дар шаҳру ноҳияҳои вилоят, намояндагони мақомоти ҳифзи ҳуқуқ, инчунин меҳмонон ва волидайни даъватшавандагон иштирок карданд.
Пас аз эълони савгандёдкунӣ даъватшавандагон дар ҳузури ҳайати фармондеҳии қисми ҳарбӣ, хешу табор ва наздикон қасам ёд карданд, ки ба Ватани худ садоқатмандона хидмат карда, вазифаи ҳарбии худро бошарафона ба ҷо меоранд, озодӣ, тамоияти арзӣ ва истиқлоли Ватани азиз ва сохти конститутсионии Тоҷикистонро ҳифз мекунанд.
Раиси Кумита, генерал-полковники милитсия Рустам Назарзода зимни суханронӣ ба наваскарон муроҷиат намуд: Имрӯз дар ҳаёти онҳое, ки ба номи Ватану миллат ва халқи худ савганд ёд карданд, рӯзи хеле муҳим аст. Тасаввур кунед, ки шумо ин савгандро дар шоҳидии дӯстонатон, падарону модаронатон ёд кардед ва гуфтед, ки барои ҳифозат ва таъмини амнияти кишвар, ки бешак амнияти ҳар кадоми мост, талош хоҳед кард. Ва ҳоло шумо омодаед ин савганди ёдкардаи худро дар амал татбиқ намоед. Аз ин рӯ, аз ҳамаи шумо хоҳиш менамоям, ки муддати ин ду сол ба нафъи Ватани азиз хидмати садоқатмадона кунед ва бо сарбаландӣ ин ду солро ба поён баред. Ин як мактаби инсонсозест, ки умре дар ёд мемонад.
Дар курси тайёрии сарбози ҷавон наваскарон аллакай дар бораи хидмати ҳарбӣ тасаввуроти аввалини худро пайдо карда, ба реҷаи ҳаррӯза мутобиқ шуда, асосҳои корҳои ҳарбиро омӯхтанд. Онҳо дар маросими савганди ҳарбӣ маҳорати худро дар тамрини машқӣ намоиш доданд.
Қабл аз оғоз ва пас аз анҷоми маросими савгандёдкунии ҳарбӣ аз ҷониби сарбозони гарнизон суруди миллии Ҷумҳурии Тоҷикистон иҷро карда шуда, баъдан дар зери садои оркестри ҳарбӣ марши тантанавӣ баргузор гардид ва ҳайати низомӣ ба сафар баромаданд. хӯроки нисфирӯзии идона.
Дар анҷоми маросими савгандёдкунӣ вохӯрии раиси Кумита бо волидони даъватшавандагон баргузор гардид. Онҳо бо шароити хидмат ва зисту зиндагонии писаронашон аз наздик шинос шуданд ва ба ҳама суолҳои худ доир ба хидмати аскарӣ дар ин қисми низомӣ посух гирифтанд.
