4-уми августи соли 2025, тақрибан соати 14:20 дақиқа наҷотдиҳандагони дастаи вокуниши фаврии Раёсати Кумитаи ҳолатҳои фавқулодда ва мудофиаи гражданӣ дар вилояти Суғд ду сокини ҷамоати деҳоти Гулхонаи ноҳияи Ҷаббор Расулов, Насрулло Насров ва Шоҳҷаҳон Валиевро, ки дар рӯди Сир ғарқ мешуданд, наҷот доданд.

  Дар хабар гуфта шудааст, ки ин ду ҷавон ҳарду 19-сола буданд ва дар ҳоле ғарқ мешуданд, ки қоидаҳои шиновариро намедонистанд.  

Ҳамзамон бародару хоҳар Бахтовар Абдуллоев ва Анаҳита Абдуллоева, сокинони шаҳри Душанбе, кӯчаи Рӯдакӣ, хонаи 35 ҳангоми шиноварӣ дар “Баҳри тоҷик”  дар ҳоли ғарқ шудан буданд, ки дасти мадади имдодгарони Раёсати КҲФ дар вилояти Суғд ба сӯяшон дароз шуд ва ҳарду наҷот ёфтанд.

Ин ду нафар ноболиғ буданд: Бахтовар 14 ва Анаҳита 12 сол дошт.

Ҳодиса дар соҳили “Баҳри тоҷик”, дар канори осишгоҳи “Соҳил” рух додааст.

Кумитаи ҳолатҳои фавқулодда бори дигар ба сокинон муроҷиат мекунад, ки фарзандони ноболғашонро дар соҳили обҳо беназорат нагузоранд.   

 2-уми августи соли 2025, соати 15:00 дақиқа шаҳрванд Бобоҷонов Суҳробиддин Маҳмадсодиқович соли таваллудаш 1995, истиқоматкунандаи деҳаи Пистазори ҷамоати деҳоти Эсамбойи ноҳияи Рӯдакӣ, ҳангоми оббозӣ дар дарёи Кофарниҳон ғарқ шуда буд.

Баъд аз роҳандозии як силсилаи корҳои кофтукобиву наҷот рӯзи 4 – уми августи соли 2025, соати 17:30 дақиқа ҷасади номбурда 8-км дуртар аз ҷои ҳодиса аз тарафи наҷотдиҳандагони Раёсати хадамоти таъиноти махсусгардонидашудаи кофтуковӣ-наҷотдиҳии Кумита пайдо ва дар шоҳидии кормандони мақомоти ҳифзи ҳуқуқ ба хешовандонаш супорида шуд.