Шабонарӯзи гузашта дар қаламрави кишвар вазиши бодҳои сарду шадид, боронҳо пуршиддат, омадани селҳо ва резиши санг ба қайд гирифта шуд.

Чунончӣ, 21-уми апрели соли равон соати 09:50 дақиқаи субҳ дар километрҳои 423 ва 427 роҳи мошингарди Душанбе-Дарвоз-Ванҷ-Хоруғ, ки аз ҳудути мавзеъи Оташак то Зелолак, деҳаи Чапараки ҷамоати деҳоти Водихуди ноҳияи Ванҷ мегузарад, резиши санг ба қайд гирифта шуд. Бар асари ин сангрезиш роҳ баста гардид.

Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон истинодан ба маълумоти Агентии обуҳавошиносии кишвар хабар медиҳад, ки дар як қатор ноҳияҳои тобеи ҷумҳурӣ, вилоятҳои Суғду Хатлон ва ғарби Вилояти Мухтори Кӯҳистони Бадахшон то 22-юми апрел хатари омадани сел боқӣ мемонад.

Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон  як бори дигар ба таваҷҷуҳи сокинон мерасонад, ки дар чунин рӯзҳо аз рафтан ба соҳили обҳо барои моҳидорӣ, шикоргоҳ барои шикор, чорвочарониву ғунучини гиёҳҳои доруворӣ худдорӣ кунанд.

21 –уми апрели соли 2025 Раиси Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон, генерал-полковник Раҷабалӣ Раҳмоналӣ ҳайати Вазорати ҳолатҳои фавқулодаи Ҷумҳурии Қирғизистон бо сарвари вазири он генерал-майор Ажикеев Бообек Эргешевич ба ҳузур пазируфт.

Дар доираи барномаи диду боздидҳои худ аз КҲФ ҷаноби Ажикеев Бообек Эргешевич бо кори Маркази идоракунии зиддибуҳронии Кумита шинос шуд.

Бино ба гузориши Хадамоти геофизикии Академияи миллии илмҳои Ҷумҳурии Тоҷикистон 21-уми апрели соли 2025  соати 11:17 дақиқаи вақти маҳаллӣ дар қаламрави Ҷумҳурии Тоҷикистон заминларза ба қайд гирифта шуд.

Маркази ин зилзила 51 километр ҷанубу шарқи шаҳри Душанбе, 59 км шимолу шарқи ноҳияи Кушониёни вилояти Хатлон дар ҳудуди Ҷумҳурии Тоҷикистон буд.

18 апрели соли 2025 наздик ба соати 03.00 субҳ дар километрҳои 0,5, 2,4,21,22 ва 24 роҳи мошингарди Душанбе-Лаби Ҷар-маркази ноҳияи Сангвор сел омад. Бар асари ин офат ин қитъаҳои роҳ муваққатан барои ҳаракати мошинҳо номумкин гардид.

Барои бартараф сохтани пайомадҳои офати табиӣ техникаи махсус ва кормандони хадамоти роҳ сафарбар карда шуданд.