Агентии обуҳавошиносии Тоҷикистон аз олудагии ҳаво дар баъзе минтақаҳои кишвар аз моддаҳои муаллақ хабар дод. Ин манбаъ гуфтааст, ки аз 29-уми ноябр то 1-уми декабри соли равон дар баъзе минтақаҳои кишвар баландшавии ҳолати олудагии ҳавои атмосферӣ аз моддаҳои муаллақ дар назар аст.

Дар шаҳру ноҳияҳои вилояти Хатлон, дар баъзе ноҳияҳои тобеи ҷумҳурӣ ва вилояти Суғд бо сабаби омилҳои метеорологӣ (хокборише, ки аз самти минтақаҳои ҷанубу ғарбӣ, ҷанубӣ ва ғарбӣ ба мамлакат ворид мегардад) баланд шудани ҳолати олудагии ҳавои атмосферӣ аз моддаҳои муаллақ (гард) пешгӯӣ карда мешавад.

Ҳавои атмосфериро моддаҳои муаллақ (гард), заррачаҳои андозаашон 10мкр (Рм-10) ва заррачаҳои андозаашон 2,5мкр (Рм-2,5) олуда месозанд.

Манбаъ дар шаҳрвандон тавсия додааст, ки дар ин рӯзҳо аз сайругашти зиёди рӯзона дар хиёбонҳо, кӯчаҳо, хусусан дар наздикии роҳҳои сернақлиёт худдорӣ намоянд.

Инчунин  шахсони гирифтори бемориҳои системаи дилу рагҳои хунгард, бемории ишемиявии дил, фишорбаландии шарёнӣ ва бемориҳои тарбодӣ дар чунин ҳаво азият мекашанд.

Кумитаи ҳолатҳои фавқулодда ва мудофиаи граждании назди Ҳукумати ҷумҳурии Тоҷикистон аз сокинон бо эҳтиром хоҳиш мекунад дар сунин рӯз аз сайругаштҳои безарурат худдорӣ кунанд. Бахусус ба гирифторони бемориҳи дил, фишорбаландӣ тавсия дода мешавад, ки миқдори лозимии дорувориро барои эҳтиёт дар захираи худ дошта бошанд.