Рӯзи 7 августи соли 2024 барои бартараф намудани паёмадҳои офати табиӣ дар деҳаи Зугванди ҷамоати деҳоти Зонги ноҳияи Ишкошим 5 адад техникаҳои вазнин, 8-техникаи муҳандисӣ ва 5-адад техникаҳои ёридиҳанда ҷалб шуда, масофаи 110 метр соҳили харобгардидаи селпарто тоза карда шуд.  Маврид ба ёдоварист, ки 4-уми август соли ҷорӣ бар асари боло рафтани дамои ҳаво ва об шудани пиряхҳо ин деҳа шоҳиди омадани як сели харобкор шуда буд. 

6-уми августи соли ҷорӣ ба Раёсати Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон дар шаҳри Душанбе хабар расид, ки дар маҳаллаи Чимтеппаи ноҳияи Фирдавсӣ, дар ҳавзи “Мехкарер” нафаре ҳангоми оббозӣ ғарқ шудааст. Ба ҷойи ҳодиса ғаввосони Раёсати КҲФ дар шаҳри Душанбе фиристода шуданд. Дар натиҷаи роҳандозии амалиёти ҷустуҷӯву наҷот соати 18:36 дақиқа ҷасади ғарқшуда аз об берун оварда шуд. Маълум гардид, ки марҳум як сокини 19-солаи маҳаллаи Гипроземи ноҳияи Синои пойтахт буда, дар натиҷаи риоя накардани қоидаҳои шиноварӣ ғарқ шудааст.

Бо мақсади амалӣ намудани дастуру супоришҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ҷиҳати расонидани кумак ба аҳолии зарардида аз  офатҳои табиӣ ва иҷрои фармоишҳои дахлдори Комиссияи давлатии Ҳукумати Ҷумҳурии Тоҷикистон оид ба ҳолатҳои фавқулода шуруъ аз 5 –уми августи соли 2024 ба оилаҳое, ки аз офатҳои табиӣ соли ҷорӣ пурра ва қисман  зарар дида буданд, аз ҳисоби захираҳои моддии давлатӣ маводи ғизоӣ, ҷиҳози рӯзғор ва масолеҳи сохтмонӣ равона карда шуд.

Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ҳамроҳ бо шарикони рушд ба монанди Барномаи ҷаҳонии озуқавории СММ дар ҶТ ба сокинони аз сел осебдида кумак расонданд. Аз ҷумла ба 206 хонавода дар ноҳияи Фархор ва 19 оила дар ноҳияи Восеъи вилояти Хатлон маҳсулоти хӯрокворӣ, ба ҳар оила 50-килоӣ орд, 2 литр равғани рустанӣ ва 5 кило нахуд расонда шуд.  Ин кумакҳо дар шоҳидии Комиссияҳои ноҳиявии ҳолатҳои фавқулода ва кормандони масъули КҲФ ба ниёзмандон тақсим карда шуд.